GALLETAS RECHEAS DE CREMA DE ABELÁS

Estas galletiñas vínllelas a Nenalinda que á súa vez copiounas de Gastronomía & Cía. Desde o momento que llelas vin souben que as ía facer. Esta Nenalinda sempre provocando coas súas delicias e coas súas boas ideas. Están boísimas e o mellor é a sorpresa interior, neste caso están recheas de nutella, aínda que as podemos rechear do que máis nos guste, de feito Nenalinda racheounas de marmelada. Mordelas e atopar ese corazón delicioso é un auténtico vicio.
Fixen o dobre das cantidades que di na receita orixinal porque dicía que saían unhas 10 galletas. Desde o meu punto de vista son poucas, non dan para nada, entón mellor duplicar os ingredientes.

Ingredientes
400 gramos de fariña de repostería
50 gramos de fariña de arroz
10 gramos de fermento en po (levadura royal)
110 gramos de manteiga
2 ovos
150 gramos de azucre
60 gramos de nata 18% m.g. (como non tiña puxen metade de nata 35% e a outra metade de leite)
un chisco de sal
Crema de abelás (nutella) para encher.

Elaboración
- Tamizar a fariña e mesturala coa de arroz nun recipiente, engadir o azucre, o fermento e o chisco de sal.
- A continuación incorporar a manteiga cortada en dados e mesturala coa fariña fregándoa cos dedos.
- Finalmente incorporar os ovos batidos e a nata. Mesturar ben ata obter unha masa manexable e firme.
- Coller porcións e facer unha bóla. Facer un oco no centro ou aplanar a masa para pór no interior media culleradiña de nutella, pechar a masa encima da nutella, xuntando os bordos e deixando dentro a nutella, selar ben e volver a bolear. Parece que se vai desparramar todo, pero non, é sinxelo. Colocámolas nunha bandexa de forno cuberta con papel de fornear.

- Metémolas no forno prequentado a 180º, o metelas baixeino a 170º, durante uns 16-18 minutos. Eu encendín o forno cando me puxen a formar as galletas. Pódense poñer 12 en cada fornada, non se desparraman coma outras (non ten demasiada manteiga e fai que manteñan a forma orixinal)
- Na primeira fornada púxen a bandexa na parte central do forno, tostáronse por debaixo e quedaron moi brancas por encima. Logo xa as puxen máis arriba e mellor.
- Saen sobre unhas 26 galletas.